Dekabrın 26-da “Nizami Gəncəvi Vəqfi” İctimai Birliyi ilə “Bakı Yunus Əmrə İnstitutu” arasında  əməkdaşlıq haqqında Anlaşma Memorandumunun imzalanması mərasimi keçirilib.

       Sənədi “Nizami Gəncəvi Vəqfi”nin direktoru Rəfi Qurbanov və  “Bakı Yunus Əmrə İnstitutu”nun direktoru Selçuk Karakılıç imzalayıb.

       Sözügedən əməkdaşlıq çərçivəsi iki qardaş və strateji tərəfdaş ölkə arasında mədəni və elmi əlaqələri daha da gücləndirmək məqsədini güdür. Bu məqsədlə türk xalqlarının tarixi, ortaq mədəni irsi, ədəbiyyatı, adət və ənənələri, eləcə də müasir mədəniyyətini tədqiq və təbliği istiqamətində birgə fəaliyyətlərin həyata keçirilməsi nəzərdə tutulur. Eyni zamanda tərəflər razılaşır ki, türk dünyasının tarixi şəxsiyyətlərini, qabaqcıl yazıçı və mütəfəkkirlərini, xüsusilə Yunus Əmrə və Nizami Gəncəvi yaradıcılığını daha geniş auditoriyaya tanıtdırılmasında birgə səylərini gücləndirəcəklər. Bu əməkdaşlıq çərçivəsində türk dünyası üçün əhəmiyyət kəsb edən xüsusi layihələrin həyata keçirilməsi, ortaq nəşrlərin çapı da nəzərdə tutulur.

         Bundan əlavə iki təşkilat arasında təcrübə mübadiləsinin aparılması da planlaşdırılır.

26.12.2022-ci il.

Azərbaycan Respublikası Mədəniyyət Nazirliyinin təşkilatçılığı ilə 2021-ci ildə cənab Prezident İlham Əliyev tərəfindən elan edilmiş “Nizami Gəncəvi İli” çərçivəsində 24-26 noyabr tarixlərində Bakı şəhərində “Nizami Gəncəvi: Mədəniyyətlər arasında körpü” mövzusunda təşkil olunan Nizami Gəncəvi Beynəlxalq Forumunun iştirakçıları tərəfindən forumun illik əsasda keçirilməsi ilə bağlı irəli sürülən təklifi və səkkiz bənddən ibarət Birgə Kommünikenin yekdil qərarla qəbul olunmasını əsas tutaraq 2021-ci ilin 30 dekabr tarixində Nizami Gəncəvi Vəqfi (NGV) təsis edilmişdir.

       Vəqfin əsas məqsədi dünya mədəniyyətinin görkəmli nümayəndəsi Nizami Gəncəvinin tərənnüm etdiyi universal dəyərləri, o cümlədən ölkəmizin tolerantlıq, qarşılıqlı anlaşma və mədəniyyətlərarası dialoq ənənələrini təbliğ etmək, Nizami Gəncəvinin vəfatından sonra Gəncə-Qarabağ bölgəsində fəaliyyət göstərmiş “Şeyx Nizami Vəqfi”nin mənəvi varisi olaraq bu irsi yaşatmaqdır. Həmçinin Azərbaycanın qədim tarixini, zəngin mədəniyyətini, ədəbiyyatını, incəsənətini və adət-ənənələrini, xüsusilə Azərbaycanın qədim şəhəri Gəncəni beynəlxalq auditoriyada geniş şəkildə tanıtmaq, Nizami Gəncəvinin ədəbi irsini tədqiq edən nüfuzlu beynəlxalq və yerli nizamişünas alimlərin bilik mübadiləsini təşviq etmək, eləcə də bu sahədə yeni tədqiqatların aparılmasına töhfə vermək, bu irsi tədqiq edən alimlər üçün Azərbaycan mərkəzli beynəlxalq əməkdaşlıq platforması yaratmaqdır.

    NGV-nin fəaliyyətinin əsas istiqamətlərindən biri də Nizami Gəncəvinin ədəbi irsinin beynəlxalq səviyyədə təbliğ etməkdir. Bu məqsədlə, “XƏMSƏ” məsnəvilər toplusunun müxtəlif dillərə tərcümə olunmasına çalışan NGV 2022-ci ildə Atatürk Universitetinin professoru Nimet Yıldırım tərəfindən Nizami Gəncəvinin “İsgəndərnamə” məsnəvisinin tam mətninin ilk dəfə olaraq fars dilindən türk dilinə tərcüməsinə dəstək göstərmişdir. “GENCELİ NİZAMÎ. İSKENDERNÂME. Şerefnâme-ikbâlnâme. Hazırlayan ve çeviren: Prof. Dr. Nimet YILDIRIM” adlı kitab Türkiyədə “Dergah” Yayınları tərəfindən çap olunmuşdur. Nizami Gəncəvinin Azərbaycan və ümumilikdə türk dünyasının böyük şair və mütəfəkkiri olaraq təqdim olunduğu əsər türk oxucularının böyük rəğbətini qazanmışdır.

    Gənc nəslin milli və mənəvi dəyərlərin daşıyıcısı olaraq yetişdirilməsi və əlverişli sosial mühitdə inkişaf etmələri  məqsədilə NGV həyata keçirdiyi layihələrdə gənclərin yaxından iştirak etmələri üçün şərait yaradır. Gənclərin dünyagörüşünün formalaşmasına, sosial məsuliyyət hissinin və komanda daxili əməkdaşlıq vərdişlərinin aşılanmasına xüsusi önəm verərək NGV tərəfindən “Kəşf et, ünsiyyət qur, inkişaf et!” şüarı ilə xüsusi “Gənclər konsepsiyası” da hazırlanmışdır.

     Vəqf eyni zamanda müxtəlif regional və beynəlxalq səviyyəli, dövlət və qeyri-hökumət təşkilatları ilə əməkdaşlıq çərçivəsində elmi və mədəni layihələrə dəstək vermək, nəticələri nəşrlər və digər vasitələrlə dünya ictimaiyyəti ilə bölüşərək fərqli mədəniyyətlər arasında körpü yaratmaq niyyətini də qarşıya məqsəd qoyub. Bu məqsədlə Vəqfin Beynəlxalq Ekspertlər Şəbəkəsi (BEŞ) də yaradılıb. BEŞ adlandırılan bu elmi platformaya nüfuzlu elm adamları, ekspert və mütəxəssislərin üzvlüyə qəbulu prosesi davam etməkdədir.

     Beynəlxalq əməkdaşlığa xüsusi önəm verən NGV bu ilin 1-4 sentyabr tarixlərində 2022-ci ildə türk dünyasının mədəniyyət paytaxtı elan olunmuş Türkiyənin Bursa şəhərində“3. Uluslararası Kozadan Kumaşa İpek Festivalı” adlı beynəlxalq tədbirdə ilk dəfə Azərbaycan ipəyini təqdim etmək məqsədilə Bakı Yunus Əmrə İnstitutunun dəstəyi və “Azəripək” MMC-nin tərəfdaşlığı ilə  “Kəlağayı: Şəkidən Bursaya doğru uzanan ipək tellər” adlı milli stendi təşkil etmişdir. NGV növbəti il ərzində də bir sıra nüfuzlu beynəlxalq təşkilat və analoji beyin mərkəzləri ilə ortaq layihələrin keçirilməsini hədəfləyir.

14.12.2022-ci il

Nizami Gəncəvi Vəqfinin direktoru Rəfi Qurbanov Bakı Beynəlxalq Multikulturalizm Mərkəzinin təşkilatçılğı ilə 2022-ci ilin  iyulun 26-da Şəki şəhərində keçirilən  “Multikulturalizm siyasəti qlobal və regional sülhün açarı kimi” adlı XII Beynəlxalq Multikulturalizm Yay Məktəbində mühazirəçi qismində iştirak edib.

İyulun 26-da direktor Rəfi Qurbanovun “Azərbaycanın xarici siyasəti: Multikulturalizm mədəniyyət diplomatiyası kimi” mövzusunda mühazirəsi dinlənilib.  Rəfi Qurbanov bildirib ki, Azərbaycandakı mədəni müxtəliflik nümunəsinin xarici siyasətdə də təbliğ edilməsi ölkəmizin multikulturalizm siyasətinin əsas tərkib hissəsidir.

“Bakı Prosesi”ilə başlayan bu siyasət ölkəmizin beynəlxalq arenada müsbət imicinin möhkəmləndirilməsinə xidmət edir. Mədəni hüquqların dövlət tərəfindən tam qorunması həm də dinc birgəyaşayış ənənələrinin qorunmasında müstəsna rol oynayır.

Qeyd edək ki, XII Beynəlxalq Multikulturalizm Yay Məktəbində 14 ölkənin (Azərbaycan, Ukrayna, Rusiya, Türkiyə, Fransa, İspaniya, Misir, Türkmənistan, Gürcüstan, Rumıniya, Qana, Nigeriya, Bolqarıstan, Suriya) aparıcı universitetlərindən 20-dən çox tələbə iştirak edib.

27.07.2022

Nizami Gəncəvi Vəqfinin (NGV) təşkilatçılığı və “Belə belə işlər” layihəsinin dəstəyi ilə “Sosial media” mövzusunda Vəqfin əməkdaşlarına və könüllülərinə 2022-ci ilin 28-29 iyun tarixlərində təlim keçirilmişdir. Keçirilən iki günlük təlimin əsas məqsədi Vəqfin media strategiyasının qurulmasına dəstəyin verilməsi, eləcə də əməkdaşların sosial media idarəçiliyi ilə bağlı bilik və bacarıqlarının artırılmasıdır. 

“Belə belə işlər” layihəsinin rəhbəri Səbinə Məlikova tərəfindən keçirilən təlimdə sosial medianın bütün seqmetləri üzrə ayrı-ayrı yanaşmaların tətbiqi, trendlər, müxtəlif təcrübələr və s. ilə bağlı mövzular diqqətə çatdırıldı. Həmçinin təbliğatla məşğul olan təşkilatların tətbiq etməli olduğu metodlar  haqqında geniş məlumat verildi. Təlim zamanı iştirakçıları maraqlandıran suallar ətrafında müzakirələr aparıldı.

Təlimin sonunda Səbinə Məlikova NGV-nin media strategiyasının inkişafına verdiyi töhfəyə görə direktor Rəfi Qurbanov tərəfindən sertifikatla təltif edildi.

– 30 / 06 /2022

Nizami Gəncəvi Vəqfinin direktoru Rəfi Qurbanov ABŞ-ın nüfuzlu Kolumbiya Universitetinin doktorantı və gənc araşdırmacı Sohee Ryukla  görüşüb.

Görüşdə dahi Azərbaycan şairi Nizami Gəncəvinin yaradıcılığı və onun təlqin etdiyi ümumbəşəri dəyərlər haqqında gənc alimə məlumat verilmiş və Nizami Gəncəvi Vəqfinin əsas fəaliyyət istiqamətləri diqqətə çatdırılmışdır. 

Vəqfin “Gənclər Platforması” barədə geniş məlumat verən R.Qurbanov bildirmişdir ki, gənc alim və ekspertlərin təşkilatın fəaliyyətinə cəlb edilməsində məqsəd həm də onların prizmasında Nizami dəyərlərinin beynəlxalq arenada təbliğidir.

Daha sonra S. Ryuk Azərbaycanda olduğu müddətdə ölkəmizin bənzərsiz mədəni müxtəlifliyindən, insanların qonaqpərvərliyindən və ölkəmizdə xalçaçılıq ənənələri ilə bağlı apardığı araşdırmasında etdiyi nəticələrdən danışıb. Sonda qarşılıqlı maraq doğuran mövzular ətrafında fikir mübadiləsi aparılıb. 

– 20 / 06 / 2022